سموم الاوجاع

حال المرض دونك أيا عذب الاطباع
واشوف نفسي مالها اليوم رغبه

لازاد له طعمن أحسه ولاجاع
غير الخفوق اللي كتم شوق قلبه

ناديت لك يامنية الروح ملتاع
قلبن يحبك حالته حيل صعبه

تسعه وثلاثينن كوتني بالاضلاع
حرارتي زادت وهالشوق نشبه

خوفي تشوف الحال فيني وترتاع
فلا دوى نافع ولافادْ طبه

مايبري الخافق من سموم الاوجاع
غير الذي قلبي وروحي تحبه

يمسح على راسي ويسندْه بذراع
والا يزيد القلب نار ويشبه

مثل الطفل قلبي إذا غبت ما طاع
يبكي على نفسه ودمعه يصبه

لا غبت معذورن اذا تاه أو ضاع
واحتار يعرف عقبك اليوم دربه

ليتك تجي وتزور قلبي ولو ساع
وليت المرض يلقى لي اليوم سبه

حجه تجيبك لو على كذب وخداع
أبيض هوانا لو تعلل بكذبه

بمرض عشانك واختلق كل الاوضاع
حتى المرض لجلك أنا صرت احبه

سر المحبه لو خفيته ترى شاع
غصبن على قلبي تبان المحبه

دمعي بحر ورموش عيني انا شراع
واللي غرق وجهي أنا بين غبه

والمركب اللي كان طوقن وفزاع
حضنك عسى يشملني اليوم قربه

حال المرض خوفي من الموت نزاع
محدن عرف وقته ولا شال حسبه

خوفي أموت واندفن داخل القاع
ويصبح هوانا ميتن بين تربه

لو مت خذ حقي من الشوق طماع
الشوق فيني ما استحى وخاف ربه

وان عشت لك قلبي على الدرب تباع
يتبع هواك العذب يهنى بشربه

يا أطيب من الطيب ياعذب الاطباع
ياحظ قلبي يوم قلبك يحبه

دمتم بحب

تحياتي لكم